SHIRIKA LA WORLD VISION LIMETOA MSAADA WA CHAKULA SHULENI KATIKA WILAYA YA MWANGA NA SAME; MKUU WA MKOA AFURAHISHWA

Posted on: March 22nd, 2023

Halmashauri ya Wilaya ya Mwanga pamoja na Halmashauri ya Wilaya ya Same zimepokea msaada wa chakula chenye thamani ya Tsh. 234,416,150/= kutoka kwenye shirika lisilo la Serikali la World Vision Tanzania. Akisoma hotuba yake kwa Mhe. Mgeni Rasmi, Bi. Nesserian Mollel, ambaye ni Mkurugenzi wa Miradi wa shirika hilo alisema, vyakula hivyo, ambavyo ni mahindi, maharage na mafuta ya kula vitawanufaisha wanafunzi 12,809 kutoka katika shule za msingi 40 na shule 9 za sekondari zilizopo katika wilaya za Mwanga na Same, Mkoa wa Kilimanjaro.

Zoezi la kuzindua, kukabidhi na kugawa chakula hicho lilifanywa na Mkuu wa Mkoa wa Kilimanjaro Mhe. Nurdin H. Babu jana tarehe 21 Machi, 2023 katika shule ya Msingi Mangara iliyopo Wilayani Mwanga. Akizungumza wakati wa zoezi la kukabidhi chakula hicho kwa Wakuu wa Wilaya za Mwanga na Same, Mhe, Mkuu wa Mkoa alisema kwamba, amefurahishwa sana  anashukuru shirika la World Vision Tanzania kwa uzalendo waliounyesha kwa kutoa msaada wa chakula shuleni. Alisistiza kwamba, chakula hiki kinakwenda kuwa msaada mkubwa kwa muda wa miezi mitatu kwa wanafunzi, na hii itasaidia kuongeza mahudhurio, kupunguza utoro wa rejareja, kuongeza ufaulu na utulivu kwa wanafunzi.

Katika hotuba yake pia, Mhe. Mkuu wa Mkoa pia alizungumzia suala la malezi kwa wanafunzi, huku akiwasisitiza wazazi pamoja na jamii ya Mwanga na Same kuhakikisha kwamba, mtoto anapata malezi mazuri ili aweze kuwa na maadili mema katika jamii. Pia ametoa wito kwa viongozi wa dini kukemea tabia mbaya na ovu ambazo zimekuwa zikiibuka katika jamii na kupelekea uwepo wa mmomonyoko wa maadili kwa watoto.

Wilaya ya Mwanga, siku za karibuni pia imenufaika na msaada wa vyakula kutoka taasisi mbili za kidini. Taasisi hizi ambazo zimekuwa msaada mkubwa kwa wanachi ni Kanisa la Kiinjili la Kilutheri Tanzania (KKKT) na BAKWATA.