Tanzania Utamaduni Carnival yaiteka Dar

Posted on: July 2nd, 2022

*Tanzania Utamaduni Carnival yaiteka  Dar.*

Na John Mapepele

Matembezi ya Kiutamaduni yajulikanayo kama Tanzania Utamaduni Carnival yaliyoandaliwa na Wizara ya Utamaduni, Sanaa na Michezo yameliteka jiji la Dar es Salaam na kuandika historia hapa nchini.

Tanzania Utamaduni Carnival ni sehemu ya Tamasha la kitaifa la Utamaduni  ambalo linazinduliwa alasiri ya leo Julai 2, 2022 na  Waziri Mkuu wa Jamhuri ya Muungano wa Tanzania. Mhe Kassim Majaliwa  kwenye Uwanja wa Uhuru jijini Dar es Salaam.

Tanzania Carnival imepita kuanzia  uwanja wa Uhuru,  daraja la Mfugale, daraja la Kijazi na daraja la Tanzanite.

Matembezi hayo ambayo yalipambwa na ngoma za makabila mbalimbali zimekuwa kivutio cha aina yake kwa wakazi wa Dar.

Mara baada ya kuwasili katika mtaa wa Kariakoo  vikundi hivyo vilikaribishwa kwa mtindo wa aina yake hali iliyowafanya  wananchi kujumuika kucheza kwa furaha nyimbo za makabila yao huku wakipongeza ubunifu wa Wizara ya Utamaduni, Sanaa na Michezo wa kuandaa tamasha na matembezi ya aina yake.

"Binafsi  naipongeza Serikali kwa kutuandalia kitu kizuri na kikubwa kama hiki nashauri iendelezwe na kufanyika kila mwaka" amefafanua  Isack Moga mfanyabiasha wa kariakoo.

Baadhi ya vivutio katika vikundi hivyo ni pamoja na kucheza na nyoka pia sarakasi za vijana waliokuwa wakiruka kutoka kwenye magari na kucheza kwa mtindo wa muziki wa kizazi kipya.